ثورة قلم اتظلم

ثورة قلم اتظلم داسوا عليه وقالوا خلاص انكسر بس عمره ماكان ينكسر لانه فى الاخر هينتصر

سلام الله عليكم


بكره يوم جميل بالنسبلى واعتقد انهو برضو يوم جميل لينا كلنا


ويمكن احسن من يوم 6 اكتوبر ويوم جلاء الانجليز عن مصر


لانه هوسبب حياتنا الجميله اللى بنعيشها والرفاهيه اللى بننعم بيها


عارفين ليه


لانه يوم تولى سيادة الرئيس زمام الامور فى مصر


بكره 14/10/2009


وعشان كده بدعوكم للاحتفال بكره بمرور 28 سنه على تولى سيادة الرئيس الحكم


سنه من الرخاء والنماء 28


سنه من العدل والمساوه بين ابناء شعبه 28


سنه افناءها من حياته عشان خاطر شعبه 28


سنه من الصدق والشفافيه فى التعامل 28


سنه من الحب الصادق والمتبادل بينه وبين شعبه 28


بجد مش عارف اقولكم ايه
بجد احنا محتاجين نقعد نكتب 28 سنه عن انجازاته وعبوره المستمر للمستقبل


وده سر تمسك الشعب بيه حتى لو عاش 28 سنه تانيه لانه بصراحه الشعب مش هيعرف يعيش من بعده
و هيتبهدل من غيره وهتبقى حالته غايه فى السوء


وعشان كده بدعوكم ترفعوا اصواتكم فى نفس واحد وتعيدوا على الريس

وتقولوا كل سنه وانت مستقر ياريس
ربنا يديم عليك الصحه ياريس عشان خاطر شعبك الغلبان

24 قول اللى فى نفسك بادب:

ههههههههههههههه
صدقت
ههههههههههههههه

ايه ده
انت بتتكلم بجد ولا ايه

ايه ياعم هو فى امن دوله هنا ولا ايه
طيب خليك ياريس قاعد على قلبنا علشان تطرى عليه

لن أكتب عن هذه الرسالة إلا كلمة واحدة بعد هذه الجملة:

رائعة

اسامة!!!
انا معرفش حد بالاسم ده

انا معاك يا اسامة ...ما دام قولت ان هو سبب فى حياتنا الجميلة يبقى انا معاك يا اوس ...
موافقون..منافقون

السلام عليكم
يا سلام اخيرا لقينا ناس بتقدر
اصل الشعب دا مش بيعرف حاجة
فالح بس يتكلم وحش عن سيادته
يالا
ربنا ع الظالم
كل سنة وانت طيب يا ريس
اطال الله في عمرك
وثبتك لمصر

نطفى بقى الشمعه ولا لسه
بس اهم حاجه ما تولعهاش تانى
كل سنه وانت طيب يا شعب يا طيب
واحنا نقول للريس كل سنه وانت طيب ليه
ما نقول للشعب نصبره على حاله
ويارب يارب السنه الجايه ما تبقاش معانا يا احلى ريس

سبهلله
ايه بقى ده
ايه معنى الضحكه دى
شكلك من جوه بلاك بالنسبه للريس
حاولى تحبى
بجد ضحكتك بتوفر كلام كتيير
دمتى رائعه

جيجى
طبعا بتكلم بجد
هو حب الريس نقدر نزايد عليه او نتكلم فيه
لا متخفيش قولوهم انك معايا بس وان شاء الله امن دوله اصلى
دمتى متالقه

with you
ايه يعم ده انت هتكتب شعر
اشكرك وبجد انت اللى رائع ومدونتك جميله

اوك اوك
بقى كده
انا معرفوهوش
طب بصى انا اول ما اتمسك هبلغ عنك
ونعم الصداقه
دمتى محرضه لينا ههههههههههه

ويل
ونعم الصداقه الصديق وقت الضيق
مادام منافقون انا معاك منا فقون
اغلبيه
رفعت الجلسه بمبيعة الريس مدى الحياه رئيسا لمصر

مصعب
هذا هو الحب الحقيقى من ابن من ابناء مصر الى سيادته
ونعم الابن البار
دمتا بارا لبلدك ورئيسك
ومع ذلك انا معاك ربنا على الظالم
اللهم امين

سمسه
طفيها بسرعه
وان شاء منحتفلش و منولعهاش مره تانيه
وكل سنه وانت طيب يا احلى شعب
وبمناسبه دى بقول للشعب
فات الكتيير ومبقاش الا القليل وربنا يصبرك على القليل
اشكرك دمتى مصبره شعبنا

الصراحه
ده احنا فى نعمه ما بعدها نعمه
ومع ذلك احنا مش عجبنا
معلش كله فى ميزان حسناته
دمت بخير

سلمى
تحياتى ليكى
بجد نورت المدونه
انا اتشرفت بحضورك
اتمنى التواصل

السلام عليكم
ياااااااااااااه
خلاص كفاية
ده انتو شعب يتحسد
متتكلمش عن محاسنو كتير
بلاش تتحسدو
داري على شمعتك

التهنئة فى صمت هذا المدونة مراقبة
وهذه الرسالة مسجلة


حاول تختفى اليومين دول يا اسامة

ربنا يزيح عننا الكرب

بس فيه شرط

لازم نتغير الأول

ومش متفائلة من اننا نتغير دي

ربنا يسترها

تحياتي

لووووووووول

حلوه التدوينه :)

سمسم
ايه رايك
دى مشكلة شعبنا انهو مش بيدارى على شمعته
وعلى رايك احنا بجد شعب يتحسد عندنا النعمه الكبيره دى وازاى منتحسديش
دمتى رائعه ومنورنى

ايها النسر المهاجر
هو انا قلت حاجه غلط انا بعبر عن حبى الشديد لسيادته
وعلى العموم النصيحه مقبوله
اشكرك يا مهاجر عصرك
بجد نصيحه غاليه
دمت رائع

ميمى

اللهم امين يستجيب منك ربنا
اشكرك بجد لازم نتغير
دمتى رائعه

قصوصه
لووووووووووووول
حلوه التعليق
اشكرك وبجد يشرفنى التواصل
وبجد نورك غط على نور الكهربه
دمتى رائعه