ثورة قلم اتظلم

ثورة قلم اتظلم داسوا عليه وقالوا خلاص انكسر بس عمره ماكان ينكسر لانه فى الاخر هينتصر

تحيه طيبه وبعد :



انا جاى النهارده احكى قصه حصلت بالفعل حصلت فى حى من اشهر احياء محافظة حلوان

وهو حى المعصره لعل البعض منكم يعرفه

على العموم

الحكايه بالظبط حصلت على طريق الاتواستراد وبالتحديد اتواستراد المعصره

المشهد بالظبط كالاتى :

هو عباره عن انسان ( رجل او امراه او طفل ) بيعدى الطريق + عربيه جايه على اخر سرعتها

وكل ده على طريق كبير وواسع وطبعا النتيجه كلكم عارفنها وهى جثه ممدوده على الارض ونهر من الدم بيسيل

المشهد ده كان بيتكرر كتيير ويكاد يكون اسبوعيا

لدرجة انى كنت راكب الميكروباص وشوفت حادثه وكانت صاحبة هذا المشهد امراه

وادا ايه المشهد ده هزنى من جوه لدرجة انى نزلت من الميكروباص عشان اشوف ايه اللى حصل

و ساعتها شوفت الجثه مغطى بالجرايد والناس ملمومين عليها

واللى خلانى اتخنق بجد

انى سمعت الناس بتتكلم بغضب

لدرجة ان بعض الناس قالوا لازم نعمل حاجه لازم نوقف الطريق عشان يحسوا بينا

وطبعا انا لما سمعت الكلام ده

قلت يا خبر ابيض لو حصل كده هتبقى مشكله

لانه ببساطه طريق زى الاتواستراد مينفعش يوقف لانه طريق حيوى وسريع

وكمان لو وقف هيوقف طريق زى الدائرى اللى رابط محافظات القاهره الكبرى مع بعض

على العموم

الشرطه طبعا جت زى الافلام العربى لما بتيجى فى اخر مشهد عشان تظهر شكل الامن فى الصوره

وبعد كده عدى اليوم وكل واحد راح لحال سبيله

وعدت الايام والحوداث بتحصل عادى خالص

لدرجة انى امى كانت بتدعلى انى ارجع ليها سالم لما تعرف انى هركب اتواستراد



على العموم

وفى يوم من الايام حصلت حادثه لشاب صغير ( 16 سنه )

وادا ايه الحادثة دى غير اى حادثه

وعلى راى المثل القائل القشه التى قسمت ظهر البعير

وساعتها ثارت ثورة المعصره الشعبيه

واخيرا ثارت المعصره وقالت لا كفايه حرام

وبقى كل واحد عارف هو هيعمل ايه

وبدات الناس ترمى طوب وحجاره ورمل

وساعتها الدنيا زاطات وجت عربيات الامن المركزى والمطافى والاسعاف

لدرجة انى برنامج العاشره مساءا جى وصور الاضراب الشعبى

وكانت كل الناس ساعتها بتردد كلمه واحده وهى كوبرى كوبرى

انتهى المشهد وانتهت الثوره

ولله الحمد دلوقتى الكوبرى على وشك الافتتاح



السؤال اللى بيطرح نفسه دلوقتى وعايزكم تجاوبونى عليه

هل ما فعله شعب المعصره صحيح واذا كان صحيحا هل توافقون على الاضراب فى شتى المشاكل التى تواجنا يوميا

ومع ذلك اتمنى ان يكون هناك حل اخر غير الاضراب لذلك ادعوكم لتحددوا معى حل اخر



اسف على الاطاله

21 قول اللى فى نفسك بادب:

للأسف يا أسامه دى بقت الطريقه الوحيده علشان يتحس بينا وبمشاكلنا
إضراب .. مظاهرات ..
والحمد لله إنه جاب نتيجه إيجابيه المره دى والحمد لله رحموا الناس من الحوادث اليوميه وإستجابوا عقبال يارب كل الطرق وكل المشاكل

بس وبعدين ؟

كل مشكله حنعمل إضراب ومش كل مره النتيجه إيجابيه بل العكس ممكن يضحوا فيها بالمضربين مافيش مشكله لاننا للأسف ما بحترمش الإنسان ذى بلاد الغرب

الحل الأخر فى رأى إحترام البنى أدم وتكريمه ومراعاة كل مسؤل لربنا ولضميره ساعتها مش حنحتاج لا لإضراب ولا حيبقى فى حياتنا مشاكل لأننا ببساطه نعانى من إنعدام ضمير عند كتير من المسؤلين
بمعنى أخر حبوب ضمير فى مياه النيل

شكرا يا أسامه على تنبيه ضمائرنا لأننا من هنا لازم نبدأ بأنفسنا

تحياتى

المشكله يا اسامه
ا ن مافيش منظومه واحده ىاعنى كل واحد يحل مشكلته بطريقته المفروض ان طريق الاتوستراد ومشاكله معروفه من زمان كان لازم فى التخطيط يتعمل حساب البشر ورغم ارقام الضحاياالمهوله الا ان الكوبرى اتعمل بعدثوره الاهالى الحكومه بتقول لنا اعملوااضراب تاخدوا حققوا

ايوة فعلا
وأنا بمصر شفت المنظر دة بس كان بنهاية الكوبري اللي عند رمسيس وكان رجل مغطى بالجرايد

لا حول ولا قوة الا بالله

طيب مين المسئول وفين الحل

ايه ذنب الأرواح دي تروح كدة

بجد اللي بيحصل مهزلة

حسب الله ونعم الوكيل

يعطيك العافية اسامة فعلا موضوع يستحق الاشارة اليه

حسبنا الله ونعم الوكيل

بأى ذنب قتلت

لنا الله

تحياتى

بصراحة اهـ
موافقة على اللى
عملوهـ لانها الطريقة
الوحيدة اللى بتتحل بها
المشاكل عندنا ولنا فى اعتصام
موظفى الضرائب السنة الماضية
اسوة وقدوة .
وعلى رأيى مدونتى هى مرايتى
ياريت بس الناس تثبت مع بعض
مش ناس تبتدى وبعدين تهرب.

الله ينصر كل مظلوم

ويقتص من كل ظالم يا رب

ااااه علي المأساة والمهزلة
بجد لازم وقفة ...

ربنا موجود

مدونتى اسمها مرايتى
اشكرك على تعليقك الجميل ده واللى فهمته منه المشكله تكمن فى عدم احترام الحكومه لادميتنا
دمتى صادقه

عطش الصبار
ياااااااااااااااه
بجد وحشتينا اكرمك الله
اشتقنا لتدوينك الرائع
بالله عليك لاتزيدى الغياب
اما بخصوص تعليقك انتى عندك حق ااننا لازم من اضراب زاظهار شكل الاعتراض
دمتى رائعه
اتمنى رجوعك سريعا

جارة القمر
ايو نعم
حسبنا الله ونعم الوكيل فى حكومتنا
اشكرك على مرورك الدائم فى مدونتى المتواضعه

ويل الاخ والصاحب

نعم حسبنا الله ونعم الوكيل
اقولك باى ذنب قتلت
ذنبها وذنبنا كلنا عشان اننا مصريين
وربنا يصلح الحال

صعبان علييه حالنا
يارب يثبتو ومره واحده تحصل ثوره بجد فى ربوع مصر كلها
بجد يشرفنى تعليقك الدائم فى مدونتى المتواضعه

افصوصه
اللهم امين \
يشرفنى تواجدك الدائم على صفحات مدونتى

ميمى
ايوه انا معاكى لازم من وقفه بس امتى
ياريت تقوللى على المعاد

الواضح ان سياسة الاضراب دي هي اللي بتجيب نتيجه معاهم مبيسمعوناش غير لما نموت ونفضل نصرخ
اذا فلنصرخ باعلى صوت

كنت هنا :)

بالعكس انا شايفه ان الاضراب ده شىء جميل جدا لانه عن طريقه الناس قدرت توصل مش هقول كل مطالبهم بس على الاقل بقوا متاكدين ان صوتهم بيوصل وبتتحقق فعلا بعض المطالب وللاسف البلد هى اللى اجبرت الشعب ان يوصل لحقه عن طريق الاضراب وهو بجد خطوة حلوة فى مصر كفايه بس انهم يسمحوا لحد يعلى صوته ويقول كفايه بقى فساد
موضوع حلو بجد بحييك عليه
تقبل مرورى

الشموع السوداء

بجد شرفتينى ونورتينى فى مدونتى المتواضعه
اما بخصوص تعليقك فانا معاكى اننا لازم نصرخ عشان يحصل استجابه حاكم حكومتنا سمعها تقيل حبتين
بجد تحياتى ليك واتمنى التوصل

وكيلة نيابه مع ايقاف التنفيذ

يا هلا يا هلا بحضرتك بجد نورت المدونه لدرجة انى من شدة نورها مش قادر اشوف تعليقك الجميل
وبجد انا مع حضرتك فى تعليقك
تحياتى ليك
اتمنى التواصل
دمتى فى رعاية الله

جارة القمر
يا سبحان الله
بجد انا سعيد انى زيارتك مدونتى مرتيين بجد ده شئ يشرفنى
بس المره الجايه تبقى تقعد شويه
ما تمشيش على طول
تحياتى ليكى

أزال المؤلف هذا التعليق.