ثورة قلم اتظلم

ثورة قلم اتظلم داسوا عليه وقالوا خلاص انكسر بس عمره ماكان ينكسر لانه فى الاخر هينتصر

سلام الله عليكم

ازيكم جميعا



انا جاى النهارده اكتب عن موضوع بيضايقنى وبيستفزنى وهو موضوع عن اعلانات الحكومه المستفزه

وطبعا انا اقصد بالمستفزه الحكومه والاعلانات مع بعض

طبعا حضراتكم بتشوفه اعلان الرخامه اللى رجع يتذاع من تانى وهو اعلان وقفه مصريه

وادا ايه الاعلان بيفكرنى باعلان قديم باسم احسبها صح

http://saortqlm.blogspot.com/2009/05/blog-post_27.html



على العموم الاعلان ده بيحسسنى ان المشكله فى الشعب وان الزياده السكانيه هى ام المشاكل

وانها هى الى بتقضى على اى تنميه الحكومه بتعملها

يعنى من الاخر ان الشعب هو السبب

وان الحكومه بتعمل اللى عليها وزياده شويه



الاعلان ده بيدعوا الى وقفه مصريه عن الخلفه

اوك لنفترض ان الكلام ده صح مع انه ولا صح ولا حاجه

بدليل ان فى دول زى الصين والهند عايشين

حد يقدر يقولى ازاى هم عايشين ومع ذلك يعتبروه من اكبر الدول الاقتصاديه

فمثلا الصين غازت العالم كله بمنتجاتها

والهند الاولى عالميا فى صناعة البرمجيات غير مشروعها النووى



المشكله مش فى تنظيم الاسر والنسل

المشكله ان فى حاجه فى هذه الدول اسمها احترام ادمية الانسان

فنرى فى الصين الاسر المنتجه هى التى تصدر لنا غالب الصناعات



طبعا انا عارف انى كلامى ممكن ميعجبش بعض الناس

ويرد عليه بعضهم بسياسة الطفل الواحد اللى تتبعها الصين للحد من النسل

وساعاتها اقدر ارد عليهم واقول ان سياسة الطفل الواحد

الصين فعلتها عندما وصل تعداد شعبها مليار ونصف المليار

مش تمانيين مليون

انت عارف يعنى ايه تمانيين مليون بالنسبه للصين

يعنى الناس اللى بتخرج تتفسح فى احد الحدائق العامه



خلاصة كلامى

ان عمر ماكانت كثر تعداد الامم يكون عائق فى تقدم الامم

ولكن العائق هو الاداره السيئه التى تدير شئون هذه البلاد وتللك الامم



وعشان كده كنت حابب اطرح عليكم سؤال

فى حد يعرف حاجه عن وزارة اسمها وزارة التخطيط

او حد فيكم شاف لهذه الوزاره اى شئ يدلل على اهميتها فى الحكومه



على العموم

كان مقصدى من هذا البوست انه يجب ان تكون هناك وقفه مصريه بس مش وقفه عن الخلفه

ولكن وقفه ضد الفساد

وقفه ضد الحراميه وما اكثرهم فى بلادنا

وقفه ضد الاتاوات المفروضه على الشعب باسمها الجديد الضرائب العقاريه

وقفه ضد الاسعار وقفه ضد الاحتكار

وقفه ضد الواسطه والمحسوبيه



يعنى من الاخر وقفه مصريه ضد الحكومه المصريه

17 قول اللى فى نفسك بادب:

السلام عليكم

الوقفه الحقيقيه إللى تبان علينا كلنا فى مصر أن اللصوص يتوقفوا عن النهب ساعتها حيبان الخير علينا كلنا
يعنى لو خدوا أجازه سنه واحده بدون مرتب حتفرق كتير وحنشكرهم
مش الخلفه السبب أبداً السبب الكروش إللى مبتشبعش ويارب يشبعوا

ودمت بخير حال

ياراجل
بقى عايز وقفة ضد الفساد
امال ياكلوا عيش منين
انا معاك فى كلامك
السكان ثروة بشرية
لازم الحكومة تستفيد منهم صح
لكن احنا لا تعليم كويس
ولا صحة ولا حرية
والحكومة زهقانة مننا
وفاتحة لنا البلاعات علشان تخلص مننا

السلام عليكم
زمان ايامنا كانت الحكومه بتسمى الناس الثروه البشريه لما الحكومات تكون بتعمل لصالح الناس يبقوا الناس ثروه
تحياتى

زمان ايام الصين مكانت مليار
سئلوا رئيس الصين او وزير صينى هتعمل اى فى مشكلة المليار صينى
قالهم انا معايا اتنين مليار ايد عاملة
امممم ربنا معانا

تحياتى

كان فى جمله فى فيلم بصراحه مش فاكراه

الحل

نرمى نص الناس فى النيل
مش أوفر من تمن الإعلانات برضه!!

بس الى يغيظ إسم الإعلان وقفه مصريه!!
تحسسك إن الموضوع خطير ومصر وقفة فيه وقفة رجاله وحررت القدس وحلت مشاكل الناس

جت على الإعلانات يا أسامه ما كل حاجه بقت تغيظ وتخليك تفرقع كمان من الغيظ

واحد من العمال
وعليكم السلام
بجد يشرفنى وجودك فى مدونتى واشكر حضرتك على الزياره واعذر تقصير ولكن مع ذلك اتمنى التواصل مع حضرتك
اما بخصوص تعليقك فانا معاك وبجد حاسس بيك مادام انت من العمال فاكيد شايف الظلم بجد
وبجد اسعدنى تواصلك
دمت بخير وسعاده

حفيدة عرابى
اولا
عندك حق فى اللى قلتى بس ان شاء الله هيجى اليوم ااننا نقف وقفه مصريه بجد

ثانيا
فانا اشتقت لرؤيه تعليقك الجميل
واعانك الله على الظلم اللى فى وزراتكم الجديده

عطش الصبار
وحشنى تعليقك
دمتى بصحه وعافيه
اما بخصوص كلامك فعندك حق
الله يرحم عبد الناصر على قد ما كان فيه سلبيات الاانه عمل كتير للشعب

دمتى بخير وسعاده

ويل الصاحب

بجد كلماتك خنقتنى فهناك فرق بين مسئول ومسئول مسئول يعى اهمية شعبه ومسئول لايعرف عن شعبه الا انه شعب الاضرابات


بجد كلامك فى الصميم
دمت اعز الاصدقاء

مدونتى اسمها مرايتى

عندك حق هى جت على الاعلانات ما كل حاجه تخنق وتغيظ

فى الاخر لايسعنى الا انا ادعو عليهم
حسبنا الله ونعم الوكيل على الظالم والمفترى

دمتى رائعه بمدونتك

والله يااسامه عندك حق فى كلامك عجبنى اسلوبك فى طرح الموضوع وخصوصا ان انا من اكتر الناس اللى بتخنق من الاعلانات بصفه عامه وفعلا الاعلان بتاع وقفه مصريه ده انا قلت ممكن اصلا يتحرم شرعا لانه مش بيدعو لتنظيم النسل ,لاء هو بيدعو الى التقصير ع طفل او اتنين وهما لازم يعملوا كده لانهم للاسف عجزوا عن تحقيق اى احلام للشباب الموجود دلوقتى فبيقولولك احنا نريح دماغنا ونقول ياجماعه كفايه عليكم طفل واحد بيحسسونى انهم هما اللى بيشتغلوا وبيكافحوا وبيصرفوا علينا هههههه
تقبل مرورى التانى

وكيلة نيابه مع ايقاف التنفيذ

بجد كلامك فى الصميم مش عارف اقولك
ايه

دمتى بصحه وسعاده
وتقبلى تعليقى فى مدونتك

طيب انت عاوز الحكومة تعمل اعلان تقول سبب تخلفكم وفقركم اننا بنسرقكم عيني عينك
ده انت غريب حقيقي
لو انت مكانهم تعمل ايه
تركب الشعب الهم وتخليه ياكل بعضه لما يعرف انه هو سبب كل النكسات والحكومة محتارة فيه مش عارفة تساعده ازاي
تحياتي

صح جدا

التغيير حتى لو للأسوأ هو دايما أفضل من الثبات

السلام عليكم ورحمة الله

أشكر لك أخي العزيز حضورك ولا أرانا الله مكروها في عزيز لديكم

مبروك النصر لمصر
دائما هي فوق القمة

"زهقنا" منذ زمن, لكن لا يكفي أن "نزهق" وإنما علينا أن نعبر عن هذا "الزهق" ونصرخ بعلو صوتنا .. كرهنا الجزمة الإيطالي..



تحياتي