ثورة قلم اتظلم

ثورة قلم اتظلم داسوا عليه وقالوا خلاص انكسر بس عمره ماكان ينكسر لانه فى الاخر هينتصر

سلام الله عليكم

موضوعى النهارده بيتكلم عن الزهق كاحد اسباب التغيير



وعشان اوضح قصدى من عنوان البوست ياريت تقروه البوست



الزهق كلمه وحاله بتحصل للانسان فى كل مجالات حياته

يعنى ممكن الواحد يكون زهقان من شغله ومش راضى بيه

وممكن يكون زهقان من لبسه ومن اكله ومن مراته




يعنى بمعنى اصح الانسان بطبيعته بيحب التغيير

ومش لازم الزهق يكون بسبب سلبيات بيشوفها الزهقان

بــــــــــــــــل

بالعكس ممكن الواحد يزهق من الحاجه الكويسه



يعنى ممكن الواحد يزهق من مراته لانها طيبه وحنونه ومع ذلك ده فى حد ذاته بالنسبه للزهقان يسببله الزهق من طريقة معاملة الزوجه المعتاده ليه يعنى حابب يغير الروتين ويضرب مره بالشبشب


ده الانسان الطبيعى اللى بجد اللى لما بيزهق بيحاول يغير الحاجه اللى مزهقه



وعشان توصل وجهة نظرى ليكم

معانا مثال تانى للتوضيح



ايه رايكم فى واحد صاحبنا كان معاه جزمه جديده جدا

بس كان كل يوم بيلبسها والجزمه لسه عامله باصلها ( باين عليها ايطالى ) ولسه شغاله



على العموم

هيجى لصاحبنا يوم ويزهق منها

وساعتها ممكن يركنها على جنب ويشترى مكانها كاوتش باتا معفن

مع انها ممكن تكون اغلى واشيك من الكاوتش

وده لان الانسان بطبيعته بيحب التغيير



على العموم بعد المقدمه الطويله عن الزهق



كنت حابب اوجه كلامى دلوقتى الى السياسين اللى بيعارضوا فكرة الترشح امام الرئيس وابنه

بدعوه ان الرئيس هو صمام الامان لهذا البلد

وان حكمة الرئيس هى المحرك الرئيسى لمواجهة التحديات

الى اخره من التصريحات الحكوميه



وانا هنا مش مع مرشح معين او ضد الرئيس نفسه

انا مع فكرة التغيير فى حد ذاتها



ما هو مش معقوله

الناس متكنوش زهقت من حد عايش معاهم ومالى عليهم حياتهم بخطاباته وقرارته

وصوره اللى فى الجرايد والتليفزون وفى كل حته فى المحروسه لمده قربت على التلاتين سنه



حتى لو كان الرئيس كويس ومافيش عيوب فيه وان هو مثالى وشفاف ونزيه وكل الصفات الطيبه فيه

لان الانسان بطبيعته بيحب التغيير



وده يخلينى اطرح عليكم سؤال

هل احنا ناس طبيعين بتزهق وحابه التغيير ولا حاجه تانيه................؟!



لو كانت الاجابه بنعم

فعشان خاطرى بارجوكم من دلوقتى ولحد 2011 وعليكم خير

انكم تجهزوا بطاقتكم الانتخابيه عشان تقولوا للعالم كله

انكم ناس طبيعين و بتحبو التغيير

13 قول اللى فى نفسك بادب:

مين قالك ان احنا بنزهق طب دانا مبعرفش انام الا لما ابص فى وشه والعنه ..

هلعن مين بعده يعنى ...ده حتى مسلى

تحياتى

ايه بس ياأسامة
انت ما تعرفــــش
المثل اللى بيقولك:
اللى تعرفه أحسن من
اللى ماتعرفوش:(:(:(
عارف فكرتنى بشويكار فى
مسرحية سيدتى الجميلة لمّا
بتسأل مفيش حاجة حرشة:)
زهقت من أكل الحلووووو:)

كنا زمان بنزهق ونحب التغير

بس الظاهر من إلى حاصل حوالينا خلاص الزهق هو إلى زهق مننا وبقى عندنا داء التعود

عارف زمان وانا فى ابتدائى كنت بزهق جدا من أستكتى إلى عمرها ما كانت بتخلص معايا أخر ما بزهق كنت أعد أبوظ فيها وأقطعها علشان أجيب غيرها الله لو نقدر نعمل كده قبل ما يمشى

تحياتى

ازيك ويل
والله وجهة نظر لازم احترامها
بس انا قرب يجلى اكتئاب

صعبان عيه حالنا

ههههههههه
حلو اوى المثل اللى قولتى
وانامعاكى بطالب بحاجه حرشه

مرايتى
على رايك
الزهق هو اللى زهق مننا
لاحول ولاقوة الا بالله
ربنا يصلح الحال

كلمنى شكرا .......

انت فين ياصاحب القلم الثائر المظلوم
زهقت ولا ايه :)

البوست ده فكره جديده يا اسامه
انك ممكن ما تكونش ضد فلان لكن التغيير فى حد ذاته مطلوب
اوعى تكون زهقت من الكتابه
فين الجديد

بجد معاك حق يا اسامه التغيير مطلوب وخصوصا لما تلاقي انك اصلا مش مرتاح للي بيحصل في البلد يعني احنا لما نقول عاوزين نغير دا هيكون من حقنا اوي ومش هنكون بنفتري على النظام أوالحاكم يعني

كيف حالك؟
لسه زهقان برضه؟

اسامة
اخبارك ايه
اعتزلت التدوين ولا ايه
طيب طمنا عليك

ايه يا اسامه انت فين ويل قلقنا عليك