ثورة قلم اتظلم

ثورة قلم اتظلم داسوا عليه وقالوا خلاص انكسر بس عمره ماكان ينكسر لانه فى الاخر هينتصر



هرسمك من تانى
هرسمك وهرسم فيكى كل المعانى
هرسمك حلوه زى العروسه فى احلى الليالى
هرسمك منوره والشمس طله ساعة العصارى

هرسم فيكى الحضاره والاصاله
وهرسم اللى فى حُبك حياره

هرسم شمسك وقمرك وضلك
وهرسم اللى من قلبه حَبك
هرسم نيلك طيورك وشجرك
هرسم سماءك وزرع ارضك
هرسم براءتك هرسم شقاوتك هرسم حقيقتك
هرسمك زى ما انتى من غير بودره على وشك

هرسمك بتلقائيه بعفويه من غير نظام
هرسمك بعشوائيه .... عشوائية بيوت شعبك الغلبان
هرسمك على رجلك واقفه ومرفوعه الراس
هرسمك بضحكه صافيه من قلب مليان احساس
هرسمك ... ومش مهم كان معايا قلم جاف او رصاص
هرسمك ... ومش مهم كان معايا ورقه واحده او ميت كراس
هرسمك ... وف اخر المطاف .. لازم احط رسمتك فى احـلـهـا برواز






-سكوت هنزور

ده شعار الحزب الوطنى فى مرحلة الانتخابات والتى بدات بانتخابات مجلس الشورى والتى احرزت تفوقا كاسحا لصالح الحزب الوطنى بسبب ذلك الشعار وربنا يستر على انتخابات مجلس الشعب والرئاسه اللى جايين(وسلمولى على جمال مبارك رئيسا لكل المصريين)



-خلاصة العلام ورقه فى امتحان

اما هذه العباره فتشير الى حال تعليمنا المشمئز وحال طلاب العلم وانه بمجرد خروج الطالب من لجنه الامتحان لو اردت ان تساله عن اى سؤال اتى فى الامتحان يرد عليك يكل غرابه ويقولك

هو كان امتحان ايه اصلا وهذا يعنى ان خلاصة حوالى 15 سنه تعليم تذهب هباءا منثوره بمجرد تسليم اخر ورقه امتحان فى اخر سنه ليقف بعدها الطالب فى طابور العاطلين الباحثين عن عمل يناسب تعليم السنين(وسلمولى على الكورسات)



-قطرات دماء مقابل قطرة ماء

اما هذه الجمله فتشير الى المستقبل المشرق الذى ينتظر اجيالا ستاتى من بعدنا لتواجه بمفردها واقع سيكون مفروضا عليها وهو الدفاع عن امن مصر المائى مش السياسى(وسلمولى على الافارقه)



-لوبصيت على الناس فى الموصلات هتلاقيهم فى غاية الانبساط

اما هذه العباره فهى رساله قصيره من تليفون محمول مساعد وزير النقل والمواصلات اللى تليفون سعادة الوزير نفسه

وبيها بيتعرف سعادته على اخبار وزارته وهو فى الساحل الشمالى بيصيف

ملحوظه :- فى ناس وحشه بتقول ازاى سيادة بيتابع شغله بالتليفون

هرد عليهم وهقولهم مش الحكومه الموقره حكومه الاكترونيه وبما ان المحمول جهاز الاكترونى اذا سيادته بيلتزم بتعليمات حكومته الالكترونيه (وسلمولى على مراوح المترو وقطارات الصعيد)



-ليس كل مانتمناه يتحقق

هذه العباره تلخص حالنا نحن البشر فى تلك الحياه الدنيئه فدنيانا مليئه بالتناقضات فنره الحزن والسعاده والحب والكراهيه

والهمه والكسل

والغنى والفقر

وخلاصه تلك العبار ان ليس كل مايسعه اليه الانسان يتحقق وان ليس كل ماتشتهيه النفس تحصل عليه(وسلمولى على المصريين)

سلام الله عليكم


دومتم جميعا بكل خير

لطالما اشتقت اليكم والى مدوناتكم الجميله

والمعذره لغيابى المتكرر وهذا والله لظروف خارجه عن ارادتى


اما بعد

موضوع انهارده بيتكلم الحريه وقد ايه من متابعتى الدائمه للحريه

اكتشقت ثلاثه انواع منها

اردت ان اناقشها معكم وهم كالاتى


1- الحريه فى الحمام

2- حريه براد الشاى

3- حريه الرصيف


هنبدا باول نوع وهى الحريه فى الحمام

ياريت ما تستغربوش من هذا المسمى وعلشان تفهموا قصدى من هذا الاسم تعالوا نشوف هذا المشهد

كنت فى احدا المساجد فى حلوان ودخلت الحمام وبمجرد غلقى للباب وجدت كلاما استغربته فى اول الامر لان هذا الكلام لاينبغى ان يكتب فى الحمام

الكلام كان عباره عن راى لاحد المصلين وكان عباره عن سب فى النظام والحكومه والرئيس

وقتها ضحكت ضحكه مليئه بالسخريه وكانت ايضا مليئه بالحزن العميق


النوع الثانى من الحريه هو حريه براد الشاى


فلتتخيلوا معى ان براد الشاى هو مصر وان الماء الموجود بداخل البراد هو الشعب

وان النار الموجوده تحت البراد هى الحكومه

لعل معظمنا راى براد الشاى وهو يغلى ولكن القليل منا من يلاحظ ان للبراد ثقب صغير

ومن هذا الثقب يتصاعد منه البخار فلولا صعود البخار من الثقب لانفجر البراد بما فيه

ملاحظه لم تسئلونى ماذا يمثل البخار والثقب بالنسبه لنا

يمثل لنا البخار حزب المعارضه والذى يمثله صحف المعارضه ونحن المدونون ايضا

فاليخرج البخار كما شاء ولتقول صحف المعارضه والمدونون ماشاءو

ويمثل لنا الثقب المساحة المحدده لنا من الحريه

فالعبره بالنهايه فمادامت النار مشتعله تحت البراد فالتفعل الحكومه ماتشاء


النوع الثالث حريه الرصيف


لعلكم كنتم تسمعون ذلك الاعلان الذى يقال فيه ( فيروز التطور الطبيعى للحاجه الساقعه )

فهذا النوع من الحريه هو التطور الطبيعى لحريه براد الشاى

فبعد اتفاقنا بان براد الشاى له ثقب يتصاعد منه البخار وان لولا هذا الثقب لانفجرالبراد من الغليان

فمع كثرة تصاعد البخار وضيق الثقب وجدنا حريه الرصيف الموجوده عند مجلس الشعب

وراينا الناس يفعلون ما يشاءون حتى وصل الحال بهم الى الوقوف عراه كى يطالبوا باسترداد حقهم المسلوب


اخيرا ساطرح عليكم سؤالا واحدا وهو ما هو النوع الذى اخترتموا من الحريه والذى يناسبكم

دومتم ودامت اقلامكم بكل حريه




دقت الساعه الثانيه عشر مساءا لتعلن عن انتصاف الليل واذا بصوت عربة الاسعاف يقترب من مبنى المستشفى التى اعمل بها


واذا بانذار الطوارى يصيح فينا ليعلن عن حاله طارئه


فاتجهت نحوها مسرعا


لاجد الدكتور محمد انسان قد سبقنى الى الحاله


ولما رانى من بعيد نادنى بصوته العالى وهو يردد


يا مصرى تعالى ساعدنى فى وضع الحاله على سرير الطوارى


فقمت على الفور لارفع الحاله على السرير حتى يتم فحصها


ثم تركت الدكتور انسان ليفحصها


ومن بعدها سيكتب تقريره عنها




وبعد ساعه من الفحص المستمر خرج الدكتور انسان من غرفة الطوارى وعلى وجهه علامات الذهول والدهشه


فبادرته بسؤال سريعا عن سبب الذهول والدهشه اللذان يملان وجهه


فرد بكل اسى وحزن


لااعلم لهذا الجسد اى ملامح من شدة الامراض التى لحقت به


حتى اننى لا استطيع ان اميز ان كان الجسد لرجل او لامراه




ثم مالبث وان انتهت حالة الذهول من على وجهه ليفاجنى بعدها بقرار كان صعبا عليه


وهو ان يجعلنى مشرفا على هذه الحاله بمفردى


فقلت له ماذا ؟!!!!


فرد عليه وقال انت افضل من يشرف على تلك الحاله لانى ارى فيك الطموح واشراقة الامل


ولاتنسى انك قد اكنسبت من الخبرات ما يؤهلك لذلك




وبعد جدال طويل وافقت ولكن كانت موافقه مشروطه


وهى ان يعاونى الدكتور انسان فى تلك الحاله




وبعدها دخلنا غرفة الطوارى ليتم فحص الحاله من جديد




وبعد مرور اكثر من خمس ساعات


خرجنا ومعنا تقرير يصدم كل من يراه




اولا كان الجسد لامراه وبالتحديد لام


وكانت ام لابناء كثر منهم من هجرها بحثا عن الرزق ومنهم من وسع الله عليه فجحدها وانكر جميلها


ومنهم من زال يحبها ولكنه ليس معه ما يبدد حزنها


الـمـهـم


بدا فحصنا من منطقة الراس واكتشفنا كميات كبيره من التخدير ( الغزو الفكرى ) والذى كان ياتى من مؤثرات خارجيه وكان لنا بمثابة الصدمه لانه ياتى ممن يدعون صداقتها وهم فى الاصل الد اعدائها




وبعدها بدانا الفحص على الجلد فاكتشفنا مرض فى غاية الخطوره وهو نادر الحدوث فى اجسامنا وهو حرب الخلايا ( الفتنه الطائفيه ) وهو عباره عن حرب قائمه بين الخلايا مع بعضها البعض


وهذا المرض من اصعب الامراض التى يتم علاجها حاليا


ثم اكتشفنا مرض اعتبره من اخطر الامراض وهو فقر الدم ( عدد الفقراء تعد السبعين فى المئه ) لان هذا المرض هو المسبب الرئيسى لامراض كثيره مثل الهياج الجنسى ( التحرش والاغتصاب ) ومرض التفسخ الانسانى ( الفساد باتواعه )




وبعد فحصنا عليها ادخلنها غرفة الاتعاش ختى تفيق من غيبوبتها




الذى يحيرتى الان هو اننى لم اعرف لها اسما ولا عنوانا حتى الان




الى ان احصل على عنوانا لها


ادعوكم جميعا ان تدعوا لها بالشفاء العاجل


واتمنى منكم ان تعلموننى اسمها اذا اتيتم لزيارتها




امضاء
مصرى مغرم بامه




سلام الله عليكم

موضوعى النهارده بيتكلم عن الزهق كاحد اسباب التغيير



وعشان اوضح قصدى من عنوان البوست ياريت تقروه البوست



الزهق كلمه وحاله بتحصل للانسان فى كل مجالات حياته

يعنى ممكن الواحد يكون زهقان من شغله ومش راضى بيه

وممكن يكون زهقان من لبسه ومن اكله ومن مراته




يعنى بمعنى اصح الانسان بطبيعته بيحب التغيير

ومش لازم الزهق يكون بسبب سلبيات بيشوفها الزهقان

بــــــــــــــــل

بالعكس ممكن الواحد يزهق من الحاجه الكويسه



يعنى ممكن الواحد يزهق من مراته لانها طيبه وحنونه ومع ذلك ده فى حد ذاته بالنسبه للزهقان يسببله الزهق من طريقة معاملة الزوجه المعتاده ليه يعنى حابب يغير الروتين ويضرب مره بالشبشب


ده الانسان الطبيعى اللى بجد اللى لما بيزهق بيحاول يغير الحاجه اللى مزهقه



وعشان توصل وجهة نظرى ليكم

معانا مثال تانى للتوضيح



ايه رايكم فى واحد صاحبنا كان معاه جزمه جديده جدا

بس كان كل يوم بيلبسها والجزمه لسه عامله باصلها ( باين عليها ايطالى ) ولسه شغاله



على العموم

هيجى لصاحبنا يوم ويزهق منها

وساعتها ممكن يركنها على جنب ويشترى مكانها كاوتش باتا معفن

مع انها ممكن تكون اغلى واشيك من الكاوتش

وده لان الانسان بطبيعته بيحب التغيير



على العموم بعد المقدمه الطويله عن الزهق



كنت حابب اوجه كلامى دلوقتى الى السياسين اللى بيعارضوا فكرة الترشح امام الرئيس وابنه

بدعوه ان الرئيس هو صمام الامان لهذا البلد

وان حكمة الرئيس هى المحرك الرئيسى لمواجهة التحديات

الى اخره من التصريحات الحكوميه



وانا هنا مش مع مرشح معين او ضد الرئيس نفسه

انا مع فكرة التغيير فى حد ذاتها



ما هو مش معقوله

الناس متكنوش زهقت من حد عايش معاهم ومالى عليهم حياتهم بخطاباته وقرارته

وصوره اللى فى الجرايد والتليفزون وفى كل حته فى المحروسه لمده قربت على التلاتين سنه



حتى لو كان الرئيس كويس ومافيش عيوب فيه وان هو مثالى وشفاف ونزيه وكل الصفات الطيبه فيه

لان الانسان بطبيعته بيحب التغيير



وده يخلينى اطرح عليكم سؤال

هل احنا ناس طبيعين بتزهق وحابه التغيير ولا حاجه تانيه................؟!



لو كانت الاجابه بنعم

فعشان خاطرى بارجوكم من دلوقتى ولحد 2011 وعليكم خير

انكم تجهزوا بطاقتكم الانتخابيه عشان تقولوا للعالم كله

انكم ناس طبيعين و بتحبو التغيير

سلام الله عليكم

ازيكم جميعا



انا جاى النهارده اكتب عن موضوع بيضايقنى وبيستفزنى وهو موضوع عن اعلانات الحكومه المستفزه

وطبعا انا اقصد بالمستفزه الحكومه والاعلانات مع بعض

طبعا حضراتكم بتشوفه اعلان الرخامه اللى رجع يتذاع من تانى وهو اعلان وقفه مصريه

وادا ايه الاعلان بيفكرنى باعلان قديم باسم احسبها صح

http://saortqlm.blogspot.com/2009/05/blog-post_27.html



على العموم الاعلان ده بيحسسنى ان المشكله فى الشعب وان الزياده السكانيه هى ام المشاكل

وانها هى الى بتقضى على اى تنميه الحكومه بتعملها

يعنى من الاخر ان الشعب هو السبب

وان الحكومه بتعمل اللى عليها وزياده شويه



الاعلان ده بيدعوا الى وقفه مصريه عن الخلفه

اوك لنفترض ان الكلام ده صح مع انه ولا صح ولا حاجه

بدليل ان فى دول زى الصين والهند عايشين

حد يقدر يقولى ازاى هم عايشين ومع ذلك يعتبروه من اكبر الدول الاقتصاديه

فمثلا الصين غازت العالم كله بمنتجاتها

والهند الاولى عالميا فى صناعة البرمجيات غير مشروعها النووى



المشكله مش فى تنظيم الاسر والنسل

المشكله ان فى حاجه فى هذه الدول اسمها احترام ادمية الانسان

فنرى فى الصين الاسر المنتجه هى التى تصدر لنا غالب الصناعات



طبعا انا عارف انى كلامى ممكن ميعجبش بعض الناس

ويرد عليه بعضهم بسياسة الطفل الواحد اللى تتبعها الصين للحد من النسل

وساعاتها اقدر ارد عليهم واقول ان سياسة الطفل الواحد

الصين فعلتها عندما وصل تعداد شعبها مليار ونصف المليار

مش تمانيين مليون

انت عارف يعنى ايه تمانيين مليون بالنسبه للصين

يعنى الناس اللى بتخرج تتفسح فى احد الحدائق العامه



خلاصة كلامى

ان عمر ماكانت كثر تعداد الامم يكون عائق فى تقدم الامم

ولكن العائق هو الاداره السيئه التى تدير شئون هذه البلاد وتللك الامم



وعشان كده كنت حابب اطرح عليكم سؤال

فى حد يعرف حاجه عن وزارة اسمها وزارة التخطيط

او حد فيكم شاف لهذه الوزاره اى شئ يدلل على اهميتها فى الحكومه



على العموم

كان مقصدى من هذا البوست انه يجب ان تكون هناك وقفه مصريه بس مش وقفه عن الخلفه

ولكن وقفه ضد الفساد

وقفه ضد الحراميه وما اكثرهم فى بلادنا

وقفه ضد الاتاوات المفروضه على الشعب باسمها الجديد الضرائب العقاريه

وقفه ضد الاسعار وقفه ضد الاحتكار

وقفه ضد الواسطه والمحسوبيه



يعنى من الاخر وقفه مصريه ضد الحكومه المصريه

تحيه طيبه وبعد :



انا جاى النهارده احكى قصه حصلت بالفعل حصلت فى حى من اشهر احياء محافظة حلوان

وهو حى المعصره لعل البعض منكم يعرفه

على العموم

الحكايه بالظبط حصلت على طريق الاتواستراد وبالتحديد اتواستراد المعصره

المشهد بالظبط كالاتى :

هو عباره عن انسان ( رجل او امراه او طفل ) بيعدى الطريق + عربيه جايه على اخر سرعتها

وكل ده على طريق كبير وواسع وطبعا النتيجه كلكم عارفنها وهى جثه ممدوده على الارض ونهر من الدم بيسيل

المشهد ده كان بيتكرر كتيير ويكاد يكون اسبوعيا

لدرجة انى كنت راكب الميكروباص وشوفت حادثه وكانت صاحبة هذا المشهد امراه

وادا ايه المشهد ده هزنى من جوه لدرجة انى نزلت من الميكروباص عشان اشوف ايه اللى حصل

و ساعتها شوفت الجثه مغطى بالجرايد والناس ملمومين عليها

واللى خلانى اتخنق بجد

انى سمعت الناس بتتكلم بغضب

لدرجة ان بعض الناس قالوا لازم نعمل حاجه لازم نوقف الطريق عشان يحسوا بينا

وطبعا انا لما سمعت الكلام ده

قلت يا خبر ابيض لو حصل كده هتبقى مشكله

لانه ببساطه طريق زى الاتواستراد مينفعش يوقف لانه طريق حيوى وسريع

وكمان لو وقف هيوقف طريق زى الدائرى اللى رابط محافظات القاهره الكبرى مع بعض

على العموم

الشرطه طبعا جت زى الافلام العربى لما بتيجى فى اخر مشهد عشان تظهر شكل الامن فى الصوره

وبعد كده عدى اليوم وكل واحد راح لحال سبيله

وعدت الايام والحوداث بتحصل عادى خالص

لدرجة انى امى كانت بتدعلى انى ارجع ليها سالم لما تعرف انى هركب اتواستراد



على العموم

وفى يوم من الايام حصلت حادثه لشاب صغير ( 16 سنه )

وادا ايه الحادثة دى غير اى حادثه

وعلى راى المثل القائل القشه التى قسمت ظهر البعير

وساعتها ثارت ثورة المعصره الشعبيه

واخيرا ثارت المعصره وقالت لا كفايه حرام

وبقى كل واحد عارف هو هيعمل ايه

وبدات الناس ترمى طوب وحجاره ورمل

وساعتها الدنيا زاطات وجت عربيات الامن المركزى والمطافى والاسعاف

لدرجة انى برنامج العاشره مساءا جى وصور الاضراب الشعبى

وكانت كل الناس ساعتها بتردد كلمه واحده وهى كوبرى كوبرى

انتهى المشهد وانتهت الثوره

ولله الحمد دلوقتى الكوبرى على وشك الافتتاح



السؤال اللى بيطرح نفسه دلوقتى وعايزكم تجاوبونى عليه

هل ما فعله شعب المعصره صحيح واذا كان صحيحا هل توافقون على الاضراب فى شتى المشاكل التى تواجنا يوميا

ومع ذلك اتمنى ان يكون هناك حل اخر غير الاضراب لذلك ادعوكم لتحددوا معى حل اخر



اسف على الاطاله