ثورة قلم اتظلم

ثورة قلم اتظلم داسوا عليه وقالوا خلاص انكسر بس عمره ماكان ينكسر لانه فى الاخر هينتصر




احـسـبـها صـح

مفيش حاجة واجعه قلبى ومسببالى انتفاخات زى الاعلان الغريب اللى بيطاردنى فى شوارع المحروسة بالاضافة للتلفزيون واللى شعارة تحسبها صح .... تعيشها صح .. مستفزززززز جدا .... واحد بيوفر في استهلاك المياه (إللي هي المَيّه يعني!) وهو ده إللي خلاّه يدَخّل ابنه أحسن مدارس!!!! يا سلااااااام!! طب إيه العلاقه؟؟؟!! ....
وواحد تاني بيوفر فى استهلاك الكهربا واللقطة اللى بعدها المحروس بيجرى ورا عياله فى الشاليه بتاعه فى بورتو السخنة !!!
وبعدين رمش العين وفرت من مصروفها وجابت لاب توب !!! مصروف إيه فى ليلتكم الزرقا على دماغكم إللى بيجيب لاب توب ده؟!!! وطبعا فى الاخر الجملة الاكثر استفزاززززززززز فى المجرة الارضية واللة متعديش حتى على الهنود
( على فكرة احلى تحية للهنود بتوع النووى )

..... احسبها صح ... تعيشها صح .... وعليه...... خدوا عندكم بقا.... هِيّا جت عليّا انا يعنى ؟؟؟!! ...
توتى وفر فى فلوس المخدرات بتاعته وجاب عربية هامر جديده !! تحسبها صح .... تعيشها صح

نوسة وفرت من فلوس الديسكو وسافرت 3 شهور فرنسا الصيف اللى فات وفى الغالب مش راجعه !! تحسبها صح .... تعيشها صح
سهير بتشرب علبة سجاير واحدة بس،،، بدل اتنين وبفلوسها حجزت شهر فى الفورسيييييزووون فى الرويال سويت!تحسبها صح .... تعيشها صح
حنكش قلِّب باقية فلوس العيش اللى مامته كانت بتديهالو وبيهم دفع مصاريف الجامعة الامريكية !!تحسبها صح ....تعيشها صح

عم حسين بواب العمارة وفر من التيبس اللى بياخدوا من السكان واشترى رونالدينهو بتاع البرازيل !! تحسبها صح .... تعيشها صح
عادل صاحب شركة استيراد خصم من كل الموظفين 10 ايام وبيهم جاب خاتم سوليتير للفيونكه بتاعته !! تحسبها صح .... تعيشها صح
صبحى وفر فى أكل الجبنة الروووومى وجاب فيلا فى التجمع الخامس بالبسين وجاب عوامة وزة كمان !! تحسبها صح .... تعيشها صح
طأطأ بطل يجيب الكارت ابو 25 جنية وبيجيب الكارت ابو 10 جنية وبالفرق دفع المهر والشبكة وعمل فرحه فى لندن وبيقضى شهر العسل فى الكاريبى

وعم سيد العجلاتى بدا يوفر فى لحام كوتش العجله المخروم دلوقتى فاتح اكبر اجينس عربيات فى وسط البلد
علاء الكهربائى بدل ماكان بيخد 10 جنيه فى تركيب المروحه بيخد15 اتفرج عليه دلوقتى واخد توكيل شركه عالميه كبيره فى التكييفات


!! تحسبها صح .... تعيشها صح نداء الى اصحاب القلوب الرحيمة وجمعيات الرفق بالانسان والحيوان.... اوقفوا هذا الاعلان
أو وفرولنا أدوية مكافحة الحمووووووضة

15 قول اللى فى نفسك بادب:

السلام عليكم اولا البوست مش كله من تاليفى انا شوفته عجبنى اوى حبت احط حاجه من تاليفى فيه واوريلهكم ويارب تعجبكم

ههههههههه

جميل يا أسامة

إعلان مستفز فعلا

اد ايه تعليقك عجبنى يا حس
واشكرك على تشرفيك المدونه
بجد نورت المدونه

عثل والله
بس انت لسه بتتفرج على التلفزيون
علشان صحتك يابابا ماتركزش مع الناس دى اوى
دول وصلوا لمرحلة غبية جدا من الاستفزاز
وبيزنوا على خراب عشهم

.. انها ليست مجرد اعلانات بريئة
هذه الاعلانات تبيعك الى شركات اخرى
بوست جميل وعلى فكرة انا متهيئلى ان انا اعرف الراجل ده (علاء الكهربائى)

الى لقد خلقنا احرارا
التليفزيون المصرى مش اوى
اهو ده شكل من اشكال الاستفزاز الحكومى للشعب حاكم الاستفزاز الحكومى انواع منها استفزاز الاعلام الحكومى
اشكرك على تعليقك الجميل

أطالب بصرف أدوية مضادة لفقع المرارات
من جرّاء الاعلانات

هوا الاعلان ده بس؟

ده غيره كتييييييييييير

تحياتي ..
دمت بود

ويل يا ويل
نعم انها ليست اعلانات بريئه

الاعلانات ديه عايزه تفهمنا ان العيب مش فى الحكومه العيب فى الشعب هو اللى رافع الاسعار ومنشف ريقه وخانق نفسه علشان مش بيوفر ومسرف

طبعا علاء صاحبنا
بس تتصور ان علاء لو وصل اللى كاتبهلو فى البوست ،،،،،،،
هيبعنا

اولا المدونه نورت بيك وانا سعيد بترشيفك للمدونه

انا طبعا متضامن معاك قلبا وقالبا

بس متهيلى انهم مش هيدوره على ادويه مضاده دا هيدوره على ادويه سريعه وفتاكه لقفع المرارات

الى اللقاء مع التواصل الدائم

:)
او ممكن عباس وقف في ميدان التحرير و زعق قال بحبك يا حمار
و جابوله كل يوما عبش و حلاوة و و وفر مصاريفه الشخصية
احسبها صح تعيشها صح
دمت بود

اولا : المدونه نورت بيك والحقيقه تعليقك لذيذ

اشكرك على تشريفك لمدونتى
الى اللقاء مع التواصل الدائم

كلامك جميل يا اسامه انابقى شوفت اعلان حاجه ساقعه قمة الاستتفزاز
بيقول( لو راجل اشربها)يعنى لو مشرنش مهنبقاش رجاله بصراحة نحن فى حال يثى لها
ودى قصيده فعلا بتعبر عن حال المصرين تستطيع نشرها لو تحب بس قولى رايك فيها
--------------------------------
عشان انت مصرى لازم تعانى



وتفقد كرامتك بكل المعانى


وتحرق فى دمك سنين مش ثوانى


واوعى تصدق كلام الاغانى


بتاع الحضاره وكانى ومانى


ده كله هجايص مايدخل ودانى


عشان انت مصرى العذاب بيناديك


بتبدا فى يومك حاجات بترازيك


فى نومك فى قومك تعكنن عليك


تضايقك ولسه العماص فى عينيك


مافيش ميه تشطف صابونه فى ايديك


وجسمك ملزق وريحتك عاديك


فتلبس وتنزل وفيك اللى فيك


ورايح لشغلك حتحتاج مواصله


ادى المترو واقف وكهربته فاصله


وفى الميكروباص خناقه وحاصله


اوتوبيس فرامله عايزالها وصله


وتوك توك ده تايه ومحتاج لبوصله


بتوصل لشغلك بدم اتحرق


فى زحمه وكتمه وحر وعرق


رئيسك سايبلك كومه ورق


ده غير دمغه ضايعه وملف اتسرق


وفى كام مواطن عامللك قلق


بيشكى تقول له روح اندعق


وعركه وهوجه وشاى اندلق


ومخك خلاص من الصداع اتفلق


هترجع لبيتك ده لو كان فى بيت


هتوصل هتندم ياريتك ماجيت


مراتك بتصرخ خلاص استويت


عيالك بتطلب وهات كيت وكيت


تزعق تهاتى ياناس اتهريت


ولاحد سامعك مهما هاتيت


عشان انت مصرى وده للاسف


فلازم تاسى تعيش تتقرف


وكل الاساسى فى حياتك ترف


فتنسى الكرامه وتنسى الشرف


وتسرق وتنصب او تنحرف


ودمعك بيجرى وجرحك نزف


مش انت اللى مصرى؟؟؟

اشكرك على تشريفك مدونتى
طبعا انا معاك انى الاعلانات بقت مستفزه لدرجه تجعل الواحد يحبط

اما بخصوص الشعر فهو شعر جميل وان شاء الله ابقى احط فى مدونتى
بس
اعتقد انه شعر لاحمد فؤاد نجم

اتمنى التواصل الدائم

باذن الله التواصل مستمر لان المدونة رائعة