بسم الله الرحمن الرحيم
( مواطن مغلوب على امره )
القصه وما فيها انى مشيت فيها ما لاقيتش حد فيها يقوللى انت رايح على فين
ويقوللى ليه! هو انا مين ولا ابن مين
انا حي الله واقف فى طوابيرمن الصبح لحد الليل
بصحى اصلى الفجر واجرى
احجز طابورى بدرى بدرى
وادعى واقول يا ربى يسرلى امرى علشان اجيب بجنيه
وبعدها راجع بساعتين
والفرح بينط من العين
راجع البس وامشى
علشان الحق شغلى
الاقى الطريق واقف من بدرى
اسال الناس هو فيه ايه ؟
يقوللى اصل البيه بيعدى
قلت وماله مستعجل ليه.. مهو بدرى
وقفت ساعه كمان مستنى.. اى اتوبيس يعدى
لحد ما لاقيت اتوبيس جاى سريع وبيجرى
قلت ميه ميه دا شكله هيوصلنى بدرى
رد عليه واحد وقالى.. دا مش ابو نيييييييه داده ابو جنيه..
قلت يا قلبى
وساعتها لقيت الناس بتجرى مش عارف بتجرى ليه
جريت وراءهم زى الاهطل
بصيت اتارى ابو ربع جاى يتمخطر
حمدت ربنا وركبت
وقلت يا مسهل يا رب
والحمدلله وصلت بدرى
وقعدت على مكتبى اختم وامضى
لحد ما جاى واحد وسالنى
عن اسمى واتاكد انى انا المعنى
قالى انا اتشرفت بحضرتك يا استاذ
بس يا ريت طلبى ما يستناش
قلته امرنى قالى انا عايز امضى صغيره من ايديك الحنينه
تمش بيها المرا كب الواقفه وحسنتك فيها مش قليله
ردت وقلته مش انا اللى اعمل كده يا استاذ
انا صحيح فقير بس الشرف عندى محتاس
وخلصت يومى والحمدلله على خير
وروحت بيتنا
بدرى قبل الليل
12 قول اللى فى نفسك بادب:
حرام عليك ياراجل
انا مش شايفة اى مشكلة
العيش وجابه
والمواصلات وركبها
والشغل وراحه
والرشوة واتعرضت عليه
والبيت ورجعه سالم غانم
عايزين ايه طيب ؟
اما شعب طماع صحيح
عندك حق احنا شعب طماع قارف حكومته ومشحتتها مع
حقيقى فيها ايه يعنى لو وقفنا فى الطابور ساعتين
وفيها ايه لو اتشعلنا على الاتوبيسات والمترو قفل على ايدنا
وفيها لما اوصل البيت على عربيه اسعاف على الاقل توفير فى المواصلات
تعليقك جميل جدا( شكرا )
يعنى طابور عيش وكمان بتجرى ورا اتوبيس وكمان بيتعرض عليك رشاوى ...كدة انت مثال للمواطن المصرى
وتقبل تحياتى
اسامه
اولا شكرا على مرورك واتمنى ان نتواصل
عجبنى اوى بوست احسبها صح الناس دى يا اسامه بتخاطب ناس عايشه فى جمهوريه استهباليا طب واللهى انا باشتغل بقالى بالظبط 30 سنه وكل اللى قدرت اوفره جبت بيه مج وخلاط دا بعد ما حسبتها صح
البوستات بتاعتك بتتكلم عن هموم الناس واوجاعهم عندك موهبه الكتابه الساخره فى انتظار المزيد
تقبل تحياتى
ازيك يا ويل
طبعا يا بنى انا لازم اكون مواطن مصرى شريف لا اتاثر بالمعوقات او الاغراءات
اشكرك على تعليقك الجميل
الى عطش الصبار
اولا انا اشكرك على تشريفك المدونه وبجد نورت المدونه
بشكرك على تعليقك الجميل وبجد كلامك اسعدنى وانشاء الله المزيد هيبقى احلى
اتمنى التواصل الدائم
الدنيا تاعبة الناس
الناس اللي حالتها على أدها بتنداس وبتتعب وبتعرق وهي يادوب تاكل عيشها
الشقاء سمة للغلابة يرافق خطاويهم
عشت بمصر وتذوقت حلاوة التعب وراحة الجسد
في كلا الحاتين اذا كنت مرتاح ستعيش ملك
مممممممممم
موضوعك حلو وطريقتك بسرد الموضوغ كتير حلوة
شكرا أسامة لمرورك وأسعدني تواجدك عندي
احترامي
سنتواصل
ياااااااااااااااااااااااااااااااااه
ده حال كل موضفى بلدنا الجميله مصر
ربنا يرحمنا ويحفظنا ويرزقنا يارب بالحلال ويبارك فى الرزق يارب
الى جارتنا جارت القمر
اولا انا بشكرك على تشريفك مدونتى وده شى اسعدنى
ثانيا تعليقك جميل اوى وده من بعض ما عندكم ومرة تانيه بجد نورت المدونه
مع التواصل الدائم
اولا
لك الحمد يارب احمدك يارب انا سعيد جدا انك رجعتى تانى تكتبى فى المدونه وترجه معاك الصوره المشرقه للمدونه الاسلاميه
ثانيا اشكرك على تشرفيك مدونتى وبجد نورتى المدونه
ثالثا تعلقيك يدل على معانى كتير للاسف فقدنا فى حياتنا نسال الله الرزق الطيب المبارك فيه
لايسعنى الا ان اشكرك
تحياتى
انت عارف المشكلة مش فى النظام المشكلة فى الشعب على فكره الشعب المصرى اعلم التكالية على الغير واخذ الحجج يعنى فى الغالب موظفين الحكومة لو فيه مجال للرشاوى بيقبضوا ودى حاجهمينفعش ننكرها شكرا على البوست الجميل
إرسال تعليق