عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى
عشان انت مصرى العذاب بيناديك
بتبدا فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك
ورايح لشغلك حتحتاج مواصله
ادى المترو واقف وكهربته فاصله
وفى الميكروباص خناقه وحاصله
اوتوبيس فرامله عايزالها وصله
وتوك توك ده تايه ومحتاج لبوصله
بتوصل لشغلك بدم اتحرق
فى زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفى كام مواطن عامللك قلق
بيشكى تقول له روح اندعق
وعركه وهوجه وشاى اندلق
ومخك خلاص من الصداع اتفلق
هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى ياناس اتهريت
ولاحد سامعك مهما هاتيت
عشان انت مصرى وده للاسف
فلازم تاسى تعيش تتقرف
وكل الاساسى فى حياتك ترف
فتنسى الكرامه وتنسى الشرف
وتسرق وتنصب او تنحرف
ودمعك بيجرى وجرحك نزف
مش انت اللى مصرى؟؟؟
13 قول اللى فى نفسك بادب:
جميلة اوى وبتوجع اوى
تسلم ايديك يااسامه
فى كل مكان بنحس اكتر بالام اللى احنا عايشينه خصوصا المدونات
الناس كلها عندها اكتئاب
بجد يا اسامة انت ابدعت
قدرت بكلماتك ترسم صورة المصرى اللى مش عاوزة تتغير من سنين
تحياتى لشعرك وكلماتك
قرت الشعر مرة واننين وتلاته وحمدت ربنا علي الوضع اللي أنا فيه ونفسي مصر تتقدم بقه
أكيد كل المشكل دي سوء إدارة وغياب قيادة حقيقية تستطيع ان تجمع المواطنين نحو مشورع وطني قومي يثير فيهم انتمائهم للبلد
المشاكل لا حصر لها بس أكيد يوم التغييييير قرب
بسم الله ما شااااااء الله
والله العظيم تسسلم أدييك يا أستاذنا
والله كتابة 100%
ربنا يباركلك يا رب
أخووك
الى لقد خلقنا الله احرارا
اشكرك على تعليقك الجميل وانا معاكى انها بتوجع
بس الصراحه هى مش من تاليفى
هى عجبتنى حبت اوريلهكم
الى جيجى
انتى معاكى حق انى الاكتئاب وصل لكل الناس حتى المدونون
الصراحه هى مش من تاليفى المهاجر بعتهلى وانا حبت احطها
دمتى بخير وسعاده
ويل يا ويل
انا ولا ابدعت ولا حاجه انا متهيلى ان احمد فؤاد نجم هو اللى ابدع
الى حوده ابوخاطر
انا معاك انى فى مشكله بس مش سببها سوء الاداره ولكن الفساد المتزايد عن حده
اتمنى ان يوم التغيير يقرب ياريت تتقبل راى فى موضوعك بصدر رحب
اشكرك
دمت بخير وسعاده
الى اخوانى
انا اتشرفت بيك وبجد المدونه نورها زاد هى مش من تاليفى
اتمنى التواصلالدائم
دمت بخير
شكرا يا أسامة على نشر القصيدة وبقالها صدى كويس بين القراء إدعيلى بقى
ازيك يا مهاجر
انا اللى اشكرك وبجد حلوه
اتمنى من الله ان ييسر لك الحال
تحياتى
هنعمل ايه يا اس اس هو احنا مصريين تعرفى انى لازم يكون فينا كده لكن لو اجنبى جه من بره شوف هيتعامل معاه ازاى
إرسال تعليق